Høvdu forfedrarnir ikki verið skjótir á sjóvarfallinum eftir løtuvinningi, hevði mangan verið svangligt í Føroyum
- Juul Jacobsen
Onnur tíðindi

Felagið alarar av føroyskum upprunarossum (FAFU) hevur í dag handað Anniku Olsen áheitan um at Tórshavnar Kommuna keypir og gevur felagnum rættindi at halda til á trøðni við Dalavegin í Havn, til vitjanarstað, at varðveita og menna føroysk ross.

Trøðin er av eigarunum sett til sølu, samstundis, sum verkætlanin at verja Stóra garð er farin í gongd.

Tí meinar felagið tað er eitt gylt høvi at sameina grøna økið til eitt alment gagnligt endamál.

Talan er um grønu fløtuna við Dalavegin, sum Stóri garður gongur í gjøgnum. Stóri garður er sambært skráseting hjá Tórshavnar Kommunu á trøðni við Dalavegin í sera góðum standi, eins og bert eitt annað stað úti við Strond. Fløtan við Dalavegin við Stóra garði, er helst seinasta mentanarumhvørvi av sínum slagi í upprunastandi í miðbýnum, sum er sera virðismikið og vert at varðveita við at gerast karmur um eina burðardygga verkætlan av hesum slag.

Allir høvuðsstaðir hava okkurt slag av attraktión, sum snýr seg um djór, oftast zoologiskir havar td. New York Zoo, Berlin Zoo, CPH Zoo v. Eitt av kendastu døminum í Danmark er hvussu býurin Randers, við at seta á stovn Randers Regnskov, flutti seg frá at vera ein útjaðarabýur, til at gerast eitt stórt ferðavinnumálið í Danmark.

- Okkara ynski og endamál er at vit megna at fáa Rossafløtuna at gerast ein høvuðsstaðarattraktión, har allir barnagarðar og skúla okkara í landinum vitja, aftur og aftur.

Í 2018 er talið av føroyskum rossum omanfyri 90. Um umstøðurnar fyri alingini batna, er vónin at ross nummar 100 verður folað á sumri í 2020. Støðan er, at í skrivandi stund eru føroysku rossini heimleys í Tórshavnar Kommunu.

Felagið Alarar av føroyskum upprunarossum, er kunnað av Tórshavnar kommunu um, at kommunan í størst møguligan mun ynskir at savna rossavirksemið í Havnardali og hevur eisini søkt Tórshavnar kommunu um eitt øki til fjós og reiðvirksemi í Havnardali, næst har kommunan áður hevur latið líknandi lendi til eigarar av íslendskum rossum og øðrum rossum av útlendskum uppruna.

Har hevur kommunan m.a. stuðlað hesum, við bygging av ríðihallum og gøtum. Ætlanin við at søkja um byggilendi í Havnardali var, at føroysk ross eisini kunnu gerðast náttúrligur partur av rossaumhvørvinum har.

Fyri meira enn einum ári síðani søktu vit um byggilendi í Havnardali, soleiðis at føroysk ross eisini kunnu gerđast náttúrligur partur av rossaumhvørvinum har. Vit hava fingið at vita frá Byggi- og býarskipanar deildini, at vit ikki skulu gera okkum vónir um at sleppa upp í part í Havnadali, tí mótstøðan har er stór.

FAFU vónar, at Tórshavnar kommuna, eisini í Havnardali, vil bjóða føroyska rossinum somu sømdir og eins góðar karmar, sum kommunan alsamt bjóðar eigarum av útlendskum rossum. Nú er stundin komin har høvuðsstaðurin vísur seg at ganga undan at verja føroyska rossið.

Umframt hetta, heldur FAFU, at Havnin sum høvuðsstaðarkommuna, eigur at raðfesta og varðveita eitt grønt øki í miðbýnum, har ung sum gomul, eisini tey uttan ráð til 4-hjóls trektar jeepar, hava lætta atgongd til at kunna seg um og síggja og njóta ross av føroyskum uppruna. Hoyra søguna um føroyska rossið, hvønn týdning tað áður hevði, og hvussu tað tá, varð nýtt í øllum arbeiđi á landi. At føroyska rossið var nærum avoytt, men tó bjargað í síðstu løtu, tá bert ein greðingur var eftir á lívi.

Tað er til hetta endamál, at FAFU heitir á Tórshavnar kommunu, um at ogna sær trøðna við Dalavegin. Sostatt vil ein føroysk Rossa fløta fáa eitt rótfesti og standa sum ein minnisvarði um at hátíðarhalda føroyska rossið, til gleði fyri havnaborgarar, alt føroya fólk og okkara gestir. Grøna fløtan við Dalavegin, er eitt upplagt høvi hjá Tórshavnar Kommunu at gerast aktivur stuðul og viðleikari í menningini og varðveitsluni av føroyska rossinum.

Felagið alarar av føroyskum upprunarossum (FAFU)
www.facebook.com/Upprunaross

Um tú veitst okkurt, sum VP ikki veit - skriva so til vp@vp.fo