Um tú ert eitt sindur uttanfyri, uttan at taka skaða av tí, so kann tað blíva tín styrkur
- Pál Weihe
Vágatíðindi

Talvsambandið: Í dag leygardagin verða seinastu leikirnir fluttir í landskappingini í talvi í vetur. Dystirnir í øllum deildum fara fram í skúlanum á Giljanesi. Byrjað verður longu klokkan 10 fyrrapartin.

FM-vinnarin 2019 skal finnast í røttum finaludysti millum oddaliðini úr Sandavágs Talvfelag og Havnar Telvingarfelag. Vágamenn hava munin og tryggja sær meistaraheitið, vinna havnarmenn ikki vinna dystin í minsta lagi 3-1.

Líkt er til, at sandavágsmenn eru fullmannaðir til dystin, tó at tveir av føstu spælarunum á liðnum standa til at spæla fótbóltsdyst við 07 Vestur sama dag, men hann byrjar ikki fyrr enn klokkan 17.00, og tá er talvdysturin liðugur.

Hjá havnarmonnum stendur heldur verri til. Eitt er, at alt minni enn ein 3-1 sigur ber í sær, at teir missa FM-heitið, sum teir hava havt seinastu tvey árini. Annað er, at teir verða ikki fullmannaðir til dystin, tí tveir eru í hvussu er, sum ikki fáa verið við til henda avgerandi finaludystin.

Finalan beinleiðis á netinum
Sum nakað nýtt fer Talvsamband Føroya saman við Sandavágs Talvfelag, sum hýsir hesum seinasta kappingardegnum, at skipa so fyri, at til ber at fylgja við á netinum leik fyri leik á øllum fýra borðunum í FM-finaludystinum millum Sandavág og Havnina.

Leinki til dystin er (live.faroechess.com). 

Sama leinki kann røkkast á heimasíðu Talvsambandsins - faroechess.com.

Spenningur er eisini um hvør loftar sær undan niðurflyting úr deildini. Stríðið stendur millum Kollafjarðar Talvfelag og annað lið hjá Klaksvíkar Talvfelag.

Støðan í 1. deild
Sandavágur 28 stig
Havnin 26½
Klaksvík 16
Havnin (2) 14½
Kollafjørður 12
Klaksvík (2) 11

Dystirnir í síðsta umfari:
ST-HT
KTF-HT 2
KT-KTF (2)

Oddalið í nýggjari tíð
Hyggja vit at gongdini í landskappingini í talvi fyri lið seinastu tíggju árini, sæst, at feløgini, sum nú fara at takast í FM-finaluni, eru tey, sum hava verið at kalla einaráðandi hetta tíðarskeiðið.

FM-røðin síðstu tíggju árini sæst her:
2009 HT
2010 KTF
2011 ST
2012 HT
2013 ST
2014 ST
2015 ST
2016 ST
2017 HT
2018 HT

Telvað hevur verið um meistaraheitið fyri lið í regluligari FM-kapping á hvørjum ári síðani 1971. Sjey feløg hava vunnið hesi árini:

HT 23 (Havnar Telvingarfelag)
KTF 8 (Klaksvíkar Talvfelag)
VT 6 (Vestmanna Talvfelag)
ST 5 (Sandavágs Talvfelag)
KT 4 (Kollafjarðar Talvfelag)
TT 1 (Tofta Talvfelag)
TFS 1 (Talvfelagið Streymur)

Vestmenningar flyta upp
Kappast verður í trimum deildum. Greitt er, at gamla stórfelagið, Vestmanna Talvfelag, flytur upp í 1. deild. 

Toppdystur verður eisini í 2. deild, men Havnar Telvingarfelag, sum er í hølunum á vestmenningum, kann ikki flyta upp, tí felagið hevur tvey lið í fremstu deildini frammanundan.

Eins og í báðum ovaru deildunum, endar kappingin í 3. deild eisini við oddadysti millum tey bæði fremstu liðini.

Støðan í 2. deild
Vestmanna 25½
Havnin 24
Sandavágur 17
Runavík 15½
Havnin (2) 13½
Gøta 12½

Dystirnir í síðsta umfari:
HT-VT
ST-GT
RT-HT (2)

Støðan í 3. deild
Kollafjørður 20
Klaksvík 19½
Sandavágur 17½

Í alt 9 lið

Dystirnir í síðsta umfari:
KT-KTF
TT-KTF (2)
EB/Streymur-ST
ST (2)-KT

Um tú veitst okkurt, sum VP ikki veit - skriva so til vp@vp.fo