Eg skyldi ikki kvinnurørsluni nakað!
- Margareth Thatcher
Vinna

Tvøroyrar kommuna: Ítróttahandilin miðskeiðis á Tvøroyri, Sport 24, ger nú umfatandi broytingar í handlinum, ið varð tikin í nýtslu í 2010, skrivar Tvøroyrar kommuna.

Hans Pauli Ziska Jacobsen, ið rekur handlarnar í Klaksvík, Hoyvík og á Tvøroyri, er komin suður og er farin í gongd við at bróta veggir niður og at broyta ymiskt. Hans Pauli sigur, at tá arbeiðið er liðugt, vónandi einaferð móti endanum av mars, so fer handilsøkið at fevna um uml. 180 fermetrar í mun til teir 100 fermetrarnar í dag.

Nýtt loft skal gerast, nýggj ljós setast upp og nýtt teppi skal eisini leggjast á gólvið. Hans Pauli sigur, at orsøkin til broytingarnar fyrst og fremst er tann, at hølið hevur verið heldur trongligt og við broytingunum verður høgligari hjá fólki at koma inn - tú sært betur hvat er at bjóða uppá.

Hans Pauli sigur, at sølan hevur verið sera góð hjá teimum. Ov tíðliga er at siga enn, um tað hevur ávirkað søluna at fleiri arbeiðspláss eru komin í býnum og í oynni sum heild.

“Tá arbeiðið er liðugt, so verður stongt nakrar dagar, soleiðis at alt kann verða sett uppá pláss”, sigur eigarin. Hann sigur eisini, at tá tað letur upp aftur, so verður okkurt tiltak á staðnum.

Um tú veitst okkurt, sum VP ikki veit - skriva so til vp@vp.fo