Tað er størsta fakfelagið í Italia, CGIL, sum skipaði fyri mótmælisgonguni í italska høvuðsstaðnum Rom í dag. Almenn tøl siga, at 50.000 fólk luttóku, men aðrar keldur siga, at talið var minst dupult so stórt.
Misnøgdin botnar sum so mangt annað í hesum døgum í kravinum um, at øll arbeiðsmegin í landinum hvur fingið kravboð um at lata seg koppseta ímóti korona. CIGL stuðlar kravboðunum, men tað gera ikki nógv onnur, og tí varð umfatandi herverk framt ímóti høvuðsskrivstovuni hjá fakfelagnum herfyri. Hildið verður fyri vist, at tað vóru høgravíðgongdir bólkar sum stóðu fyri herverkinum.
Myndugleikarnir hava leingi tosað um tað, men enn eru nýnazistiskir og -fasistiskir bólkar ikki bannaðir í Italia.
Um tú veitst okkurt, sum VP ikki veit - skriva so til vp@vp.fo