Tórshavnar kommuna: Kommunan hevur í nógv ár arbeitt við at gera eina útstykking í Nólsoy. Tað varð gjørt eitt prosjekt við 15 grundstykkjum, men bert 8 stykkir vórðu gjørd klár.
Ætlanin var at gera restina, alt eftir hvussu stórur eftirspurningurin fór at verða. Eftirspurningurin eftir grundstykkjum í Nólsoy er nú so stórur, at útstykkingin eigur at verða gjørd liðug.
Tað vísir seg, at tað er pláss fyri 17, heldur enn 15 grundstykkjum. Tað vil siga, at hendan nýggja verkætlanin verður 9 grundstykki.
Sambært kostnaðarmeting vil tað kosta um 1.5 miljón at gera útstykkingina klára til tey 9 írestandi grundstykkini. Í fyrstu atløgu er talan um útlegg í sambandi við gerð av nýggjari útstykking. Tá øll stykkini eru seld, hvílur verkætlanin fíggjarliga í sær sjálvum.
Mælt verður nú til at gera arbeiðið klárt til útboð, at taka av lægsta tilboði og at seta arbeiðið í gongd. Fíggjarnevndin hevur samtykt málið, sum kemur fyri býráðið hóskvøldið.
Um tú veitst okkurt, sum VP ikki veit - skriva so til vp@vp.fo
