Í fleiri mánaðir hevur ikki verið gjørligt at fingið eina veðurforsøgn á heimasíðuni Vedrid.fo, men nú sigur Vørn, at arbeitt verður við eini nýggjari heimasíðu og app.
VP spurdi Vørn, hví henda tænastan ikki var tøk á heimasíðuni, og hevur ikki verið tað í fleiri mánaðir, og sambært samskifti, VP hevur fingið, so er orsøkin, at YR hevur sløkt fyri eini tænastu, sum Vedrid.fo plagdi at brúka, fyrr í ár.
Nær heimasíða og app verða tøk í nýggjari útgávu, verður ikki kunnað um.
Vørn kunnaði herfyri um, at á Veðurstovuni, sum er deild undir Vørn, eru settir tveir veðurfrøðingar og ein deildarleiðari, umframt tímaløntir ráðgevarar og hjálparfólk.
- Veðurstovan miðar móti at yvirtaka og menna allar veðurtænastur fyri Føroyar. Men í fyrstu syftu verður miðað móti yvirtiknu økjunum, t.v.s. veðrið á landi og sjógvi, umframt mátingar.
- Ilt er at meta nær hetta arbeiðið er komið undir land, men við nýggju starvsfólkunum kemur nú veruliga gongd á hetta arbeiði, sigur Vørn.
Um tú veitst okkurt, sum VP ikki veit - skriva so til vp@vp.fo