Ikki fyrr enn ein sær, hvussu barnabørnini taka seg upp, fær ein at vita, um ein hevur uppalt síni børn væl
- Erich Maria Remarque

Rules

Only words with 2 or more characters are accepted
Max 200 chars total
Space is used to split words, "" can be used to search for a whole string (not indexed search then)
AND, OR and NOT are prefix words, overruling the default operator
+/|/- equals AND, OR and NOT as operators.
All search words are converted to lowercase.

Vinna

SEV: “Vit hava enn vónir um at fáa tær fýra myllurnar upp komandi ár, men tað krevur, at øll neyðug loyvi verða fingin til vega skjótt”, sigur Brian Joensen, verkætlanarleiðari hjá SEV.

Verkætlanin er minkað úr 6 myllum niður í 4, men enn vænta nøkur neyðug loyvi: byggiloyvi, avgerð frá Yvirfriðingarnevndini og avtalu við hagan um lendið.

Vindfelagið í Neshaga, sum er dótturfelag hjá SEV, vann útboðið hjá orkumyndugleikanum um vindmyllulund á 18 MW við Eiði í 2019, og fór beinanvegin undir fyrireikandi arbeiðið, sum m.a. umfatar árinsmetingar, umhvørvisgóðkenning, byggiloyvi, avtalu við haga um lendið osfr. Hetta arbeiðið hevur tó tikið væl longri tíð, enn væntað.

Umsókn um byggiloyvi varð latin Eiðis kommunu 19. november 2019, við eini dagføring 17. august 2020, men av ymsum orsøkum varð umsóknin ikki viðgjørd av fráfarna bygdaráði.

Dagføringin 17. august 2020 kom eftir, at avgerð var tikin um at minka vindmyllulundina úr 6 myllum á 18 MW niður í 4 myllur á tilsamans 12 MW, staðsettar í haganum Suðurhelvt.

SEV samskiftir í løtuni við nýggja bygdaráðið á Eiði um byggiloyvi, og í hesum sambandi hevur bygdaráðið kallað inn til borgarafund týsdagin 16. mars. Á borgarafundinum fara umboð fyri SEV at greiða frá verkætlanini og at svara spurningum og ivamálum, sum eiðisfólk hava um vindmyllurnar og verkætlanina sum heild. Myndir eru gjørdar, sum neyvt vísa, hvussu myllurnar fara at taka seg út úr ymsum sjónarhornum.

Afturat byggiloyvinum vantar eisini góðkenning frá Yvirfriðingarnevndini  og avtala við lendiseigararnar. Bíðað verður eftir niðurstøðu frá Yvirfriðingarnevndini, og Umhvørvisstovan er í samráðingum við hagan um atgongd til lendið.

“Myllurnar skulu bíleggjast í góðari tíð, men vit kunnu sjálvsagt ikki bíleggja myllurnar og annað neyðugt tilfar, fyrrenn vit hava fingið øll loyvi til høldar”, sigur Brian Joensen.

Ein 12 MW vindmyllulund er mett at kunna framleiða góðar 35 GWt árliga. Hetta svarar til 7.600 tons av olju ella sagt á annan hátt gott og væl ein tangabát við olju til Sundsverkið.

Loyvið til vindorkuframleiðslu umfatar 6 myllur, og arbeitt verður við at finna aðra staðseting til tvær tær síðstu myllurnar. 

Um tú veitst okkurt, sum VP ikki veit - skriva so til vp@vp.fo