- Sustainability, burðardygd, er ikki bara eitt orð vit brúka, tað er nakað vit meina. Vit skulu ikki gera nakað sum oyðileggur fyri komandi ættarlið, men vit skulu virka í samljóði við náttúruna.
Orðini eigur stjórin í alifyritøkuni Luna, Atli Gregersen, sum iLaks.no hevur tosað við.
– Vit fara at taka fisk her um nakrar vikur. Her svimja umleið ein millión fiskar, og tað gevur 5-6.000 tons. Men hetta brúkið kann bera meira fisk. Vit hava havt 1,5 milliónir fiskar, men vit fingu ov nógva lús. Vit økja aftur, tá ið vit hava loyst lúsatrupulleikan, sigur hann millum annað við iLaks.
Spurdur, um Luna eisini ætlar sær at ala rognkelsi, svarar stjórin:
- Vit hava hugsað um tað. Eitt føroyskt orðatak sigur at «har sum tú ikki ert sjálvur, ert tú ikki meira enn hálvur». Men vit vildu koma fyrr á mál, tí lúsastøðan er álvarsom. Lúsamarkið í Føroyum er hægri enn í Noregi, tað er tvær kynsbúnar lús per fisk, sigur hann.
Um tú veitst okkurt, sum VP ikki veit - skriva so til vp@vp.fo
