Byrgingin hjá SEV í Heygadali er nú tømd, og harvið eru sílini, sum partafelagið Røkt hevði gangandi í byrgingini, avtikin. Sílini vóru eini 700 í tali.
- Sílini eru send til Salmon Proteins á Eiði, sum tekur sær av at beina tey burtur, sigur Jóhan í Niðristovu, stjóri í Røkt.
Arbeitt varð annars leingi við at varðveita sílini, sum vóru tey seinastu av eini serligari føroyskari stammu. Í 2018 boðaði Umhvørvis- og Vinnumálaráðið frá, at ein loysn varð funnin, men hetta bar kortini ikki á mál, og nú eru sílini deyð.
- Hetta hevur verið eitt langt og møðsamt stríð, og vit royndu til tað allar seinasta, men nú hava vit lagt hetta afturum okkum og líta frameftir, sigur Jóhan í Niðristovu, stjóri í Røkt.
SEV hevur tømt byrgingina, tí regluligt eftirlit og viðlíkahald skal gerast.
Um tú veitst okkurt, sum VP ikki veit - skriva so til vp@vp.fo
