Tórshavnar kommuna: Byens Netværk er tvørfakligur felagsskapur innan donsku byggibransjuna. Á hvørjum ári skipa tey fyri eini lestrarferð fyri arkitektar, verkfrøðingar, entreprenørar, landsskapsarkitektar, býarplanleggjarar og byggifeløg.
Hesaferð vitja tey umleið 40 fólkini í Føroyum. Í morgun varð so skipað fyri stórum tiltaki á Hotel Føroyum, har fokus varð sett á býarplanlegging og menning, burðardygd, ferðamál og fíggjarliga og mentanarliga menning generelt.
Heðin Mortensen, borgarstjóri, legði fyri í morgun við eini framløgu um søgu og samfelag, Føroyar og Havnina, hann greiddi frá, hvussu Tórshavnar kommuna er skipað, og hvussu fíggjarligar, vinnuligar og kommunalar prioriteringar verða framdar í høvuðsstaðnum.
Aftaná greiddi býararkitekturin Birita Wardum frá um kommunuætlan, demografi, bústaðarsløg og -politikk, menningina av miðbýnum, um útbjóðing, burðardygd og umhvørvið. Tvey stór prosjekt vórðu sýnd fram: Stóratjørn og Skansabryggjan.
Aftaná greiddi Guðrið Højgaard frá strategium innan ferðavinnu, Johannes Jensen greiddi frá um mentanarferðavinnu og ígongdverandi prosjekt, og Alf Helge Tollefsen frá NCC greiddi frá stóra arbeiðnum at gera Eysturoyartunnilin.
Um tú veitst okkurt, sum VP ikki veit - skriva so til vp@vp.fo