So eru piltarnir ”undir Brúnni” aftur úti um seg og syngja fyri okkum við teirra stjørnukláru røddum.
Komandi dagarnar hava teir tríggjar ókeypis konsertir í høvuðsstaðnum.
- Tó at teir ikki hava gingið á Glasi enn, so syngja teir longu á fleiri ymiskum málum í eini høgtíð, sum hevur til endamáls at binda mannaættina saman eina løtu, siga Eli og Napoleon Smith, ið venja kórið.
Feðgarnir halda poetiskt fyri í hesu sambandi: "Leggið tí visa-kortið burt’ eina stund, og gloymið allan skund, meðan dreingjanna sangur rungar, so at vit ei minnast løtur tungar."
Eli Smith stovnaði Dreingjakórið undir Brúnni í 1999, og hevur kórið síðan vant og framført hvønn vetur saman við einum toymi av frívilligum sangglaðum fólki.
Her er konsertskráin hjá dreingjakórinum:
Leygardagur 08.12, kl. 11 í Adventistakirkjuni (mannlig dupultkvartett syngur eisini)
Týsdagur 11.12, kl. 16 í Tilhaldinum (Gentukórið Kassia er við)
Týsdagur 11.12, kl. 17:45 í SMS
Um tú veitst okkurt, sum VP ikki veit - skriva so til vp@vp.fo