Seinastu dagarnar hevur Kringvarp Føroya veitt góða og viðkomandi upplýsing um vandan av smittuni av COVID-19. Við longdum tíðindasendingum og eykatíðindasendingum hevur verið sett orð á ymisk viðurskifti, ið grundleggjandi hava týding fyri, hvussu vit sum tjóð fóta okkum í hesum døgum og teimum komandi.
MEGD vil tí heita á myndugleikan um at teksta tíðindasendingarnar, sum hava verið og tær sum koma – bæði tær ætlaðu og eykatíðindasendingarnar. Tøknin loyvir ikki beinleiðis teksting, tí kunnu vit liva við, at tíðindasendingarnar verða endursendar við teksti. Eins og Dokumentarurin.
Samstundis vil MEGD takka Kringvarpi Føroya fyri innsatsin við teknmálstulkaðum tíðindasendingum og nýggja átakinum við live-bloggi.
Tó eiga vit í dag at seta eina striku í sandin og viðurkenna, at meir skal til. Tað er ikki í lagi, at fleiri túsund føroyingar ikki verða kunnaðir í almennu tíðindasendingunum hjá Landsstýri Føroya í Kringvarpi Føroya.
Í svari til Ruth Vang, løgtingskvinnu, 24. februar 2020 svaraði Jenis av Rana, landsstýrismaður í uttanríkis- og mentamálum, í § 52a fyrispurningi, at sitandi samgonga hevur sett í samgonguskjalið, at teknmálstulking og føroyskur tekstur í sjónvarpinum skal styrkjast.
Tað er nú, tað skal vísast í verki.
Tóra við Keldu
forkvinna í MEGD
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
