Elizabeth II, drotning av Stórabretlandi, fer í dag at heita á bretar um síggja tað sum ein heiður at taka ábyrgd fyri felagsskapinum.
Hon fer í eini talu í bretskum sjónvarpi klokkan 8 í kvøld at siga við bretska fólkið, at tað er hennara vón, at tey ættarliðini sum koma aftaná okkum fara at kunna siga, at vit gjørdu tað rætta.
- Og tey, sum koma aftaná okkum, fara at siga, at bretar, sum liva á okkara døgum, vóru so sterkir sum øll onnur, og at eginleikar sum sjálvsagi, støðufesti og samkensla framvegis eyðkendu bretska fólkið.
Tað er tíðindastovan AFP sum hevur fingið nøkur brot úr taluni.
Tað er annars ikki vanligt, at 93 ára gamla drotningin talar til fólkið, uttan á jólum.
Talan í kvøld kemur samstundis sum bretar standa beint frammanfyri eini av størstu avbjóðingunum í søguni. Yvir 4.000 koronasjúklingar eru deyðir, seinasta samdøgrið doyðu yvir 700, sum er tað mesta nakrantíð eitt samdøgur. Yvir 42.000 eru smittað, ein teirra er forsætisráðharrin, Boris Johnson.
Um tú veitst okkurt, sum VP ikki veit - skriva so til vp@vp.fo