Partafelagið Faroe Real Estate Ltd hevði smáar 14 milliónir krónur í vinningi eftir skatt í fjør. Tað er nakað minni enn helvtin av yvirskotinum í 2018, tá tað var 28,7 mió kr.
Faroe Real Estate livir av at leiga bygningin á havnarlagnum í Kollafirði út til dóttirfelagið, P.P. Faroe Pelagic, og annars av at fáa inntøkur frá kapitalpørtum í dóttirfelagnum. Men Faroe Pelagic hevði eitt munandi verri ár í fjør. Bruttovinningurin minkaði niður í helvt, smáar 20 mió kr, og vinningurin, sum í 2018 var beint omanfyri 14 mió kr, endaði í fjør við lítlum halli uppá 182 tkr.
Tað eru niðurlendingar sum eiga og stjórna fyritøkunum, men í leiðslufrágreiðingini lata teir bara væl at. Talan er eisini um pengasterkar fyritøkur. Faroe Real Estate Ltd. P/f hevði fíggjarstøðujavna uppá 231,7 mió kr við árslok í fjør og eina eginogn uppá 227,6 mió kr.
Um tú veitst okkurt, sum VP ikki veit - skriva so til vp@vp.fo
