Um tað mundið, tá ið Glasir skuldi avhendast og takast í brúk, var rættiliga nógvur aktivitetur og nógv skuldi fáast liðugt, so næmingarnir komu í ein so lidnan skúla sum gjørligt.

Og tí var tað VP spurdi Landsverk, um avhendað var við allar undirveitararnar eisini, áðrenn Landsverk avhendaði skúlan.

Í svari til VP sigur Landsverk, at “flestu arbeiðstøkurnar hjá undirveitarum vóru avhendar, tá Glasir var avhendað og tikið í brúk”.

Hetta kann tykjast løgið, tá hugsað verður um, hvussu stór eykarokningin er – í løtuni mett til umleið 50 mió. krónur – sum enntá er fyri arbeiðir og/ella veitingar, har eingin heimild og løgtingsjáttan er aftanfyri.

Enn er endaliga rokningin fyri Glasir ikki gjørd upp, og spennandi verður at hoyra endaliga kostnaðin fyri verkætlanina, tá tann seinasta rokningin er komin undan kavi.

Eitt er tó púra vist, og tað er, at tað ikki vera onnur enn føroysku skattgjaldararnir, ið sleppa at rinda stóru eykarokningina viðvíkjandi vanstýrdu byggingini við Marknagil.