- Í Føroyum fagna tey sínum granskarum, sum umstillaðu fiskalaboratoriið til at kanna fólk ístaðin og harvið eru tey sloppin undan deyðsføllum.
Nakað soleiðis skrivar bretski miðilin The Guardian í grein í dag um Debes Christiansen og hansara fólk á Heilsufrøðiligu Starvsstovuni, sum við eini handavending bygdu starvsstovuna, sum vanliga kannar fisk, um, so hon ístaðin kann vera við í stóra kanningararbeiðnum og fáa staðfest, hvør í Føroyum er sjúkur av korona virusinum.
Nevnt verður í greinini, at føroysku granskararnir longu í januar ávaraðu myndugleikarnar um, hvat kundi fara at koma, og buðu sær í sama viðfangi til at gera seg til reiðar at vera við í bardaganum ímóti sjúkuni.
- Tað var ikki so nógv "hokus pokus" og vit fingu eisini lættari hendur á útgerðini, vit skuldu brúka, enn sjúkrahúsini gera, sigur Debes Christiansen við The Guardian, og leggur afturat, at sonevndu myrkatølini í Føroyum neyvan eru serliga stór, tí so nógv, eini 10% av øllum føroyingum, eru longu kannað.
Um tú veitst okkurt, sum VP ikki veit - skriva so til vp@vp.fo