Mikudagin kemur meira koppingarevni til landið, tá fleiri enn 5.000 skamtar av koppingarevni frá Pfizer/BioNTech vera í flogfarinum úr Keypmannahavn.  

Bókingarskipanin er nú latin upp aftur, og øll, sum eru 65 ár og eldri, eru vælkomin at bóka sær tíð til koppseting á corona.fo. Fyrstu tøku tíðirnar eru longu mikudagin, og hildið verður fram við koppsetingini, inntil koppingarevnið er uppi.

Møt ikki ov tíðliga
Tað hevur gingið væl at koppseta á teimum trimum koppsetingarstøðunum, tó at nógv fólk savnast, meðan opið er. Fólk tykjast glað og spent, og koma ofta í sera góðari tíð, fyri ikki at gerast ov sein. Tað hevur við sær, at tað onkra løtu eru fleiri fólk enn neyðugt á koppsetingarstaðnum.

Koppsetingartoymið vil í hesum sambandi minna fólk á at møta stundisliga, tó helst ikki meira enn 10 minuttir áðrenn tíðina.

Eingin nýggjur smittutilburður varð staðfestur í gjár. Tað vísa nýggjastu tølini hjá Landslæknanum.

253 kanningar vórðu gjørdar seinasta samdøgrið, og allar eru liðugt greinaðar. Tilsamans eru nú gjørdar 249.019 kanningar.

662 persónar hava fingið staðfest smittuna í Føroyum. 660 persónar eru nú staðfestir frískir aftur. Higartil er ein persónur deyður við koronu í Føroyum.

Í løtuni er ein persónur smittaður.