Tað er tíðindastovan Bloomberg sum metir, at ríkidømi hjá Donald Trump minkaði við 700 milliónum dollarum, sum svarar til einar 4,3 milliardir krónur árini, hann sat við endan á borðinum í USA. Men hann líðir onga neyð, tí hann eigur framvegis 2,3 milliardir dollarar ella góðar 14 milliardir krónur á kistubotninum.

Ein fjórðingur av ríkidøminum er bundið í risastórum skrivstovubygningum. Hesir eru minni verdir, tí fólk arbeiða nógv heima og hava ikki á sama hátt sum áður brúk fyri skrivstovum.

So eigur hann eisini 19 golfvøllir, og sjálvt um golf er blivið væl betri umtókt í seinastuni, og hveppa nógv seg við at brúka vøllirnar hjá Trump. Golfsambandið í USA, PGA, hevur til dømis gjørt av, ikki at halda stóru árligu kappingarnar á vøllunum hjá Donald Trump, tí hann verður settur í samband við álopið á Capitol Hill, og tað kann vera ringt fyri umdømið hjá PGA.

Fleiri nevna tó, at Donald Trump hevur nógvar og góðar møguleikar fyri at vinna tað mista innaftur, leggur hann í. Eitt nú um hann skrivar sínar endurminningar ella lata upp eina sjónvarpsrás, har hann kann samskifta við tey nógvu fólkini, sum stuðla honum.