Sjóvinnustýrið hevur skrivað frágreiðing um hendingina, tá Krossteinur sakk 8. apríl útfyri Porkerisnes.

Krossteinur var alibátur hjá Bakkafrost í Suðuroynni, og var í holtur við at kanna fisk og aliringar á Hovsfirði, tá fyrst annar og síðani hin motorurin gingu heitir so teir máttu sløkkjast. Nógvur roykur var í maskinrúminum, men tað er ivasamt um eldur var í.

Í frágreiðingini stendur millum annað:

"Boð vórðu send til alibátin Stórafles, um at neyðugt var at sleipa Krosstein inn á Vág. Stutt eftir at sleipið er byrjað, fær skipið slagsíðu á stýriborði. Avgjørt varð at sleppa endanum og taka manningina av Krossteini yvir á Stórufles. Skiparin á Krossteini metti tá, at Krossteinur hevði eina slagsíðu á stýriborð á uml. 15 stig.

Stórafles fór frá Krossteini orsakað av átrokandi arbeiði við aliringarnar. Hettar hevur verið innan kl. kl. 07:08, tá ið Brimil hevur samband við Stórufles fyrstu ferð. Kl. 07:30 boðar Stórafles Brimli frá, at Krossteinur hevur lagt mastur í sjógv, og at Krossteinur helst er farin runt. Kl. 08:08 kemur alibáturin, Skarvanes, úr Vági á staðið. Tá er eingin bátur at síggja.

Krossteinur má tí metast at vera sokkin ímillum kl. 07:30 og kl. 08:08. Knattstøðan har báturin sakk er áleið 61°28’67N; 006°40’18V, ella uml. ein hálvan fjórðing í ein landsynning úr Porkerisnesi."

Ongin endalig niðurstøða er gjørd, men fleiri ábendingar eru. Nógvur uppgangur hevði verið dagarnar áðrenn, og tað kann hugsast, at onkur skaði er komin á skrokk ella sjógvinntøk, sum eisini kunna vera blivin tipt tá báturin lá við tómgongd við bryggju í 3 tímar. 

"Útfrá einum sjónarmiði um, at tað í føroyska flotanum eru umleið 80 líknandi bátar, at Krossteinur sakk, og at mannalív kundu haft verið í vanda, tá óhappið hendi, fer Sjóvinnustýrið, í samráð við reiðaríið hjá Krossteini og øðrum aktørum á økinum, at viðgera málið við tí fyri eyga at betra enn meir um trygdina a sjónum. Leisturin í hesum arbeiði fer at snúgva seg um ábendingarnar nevndar í frágreiðingini, við serligum atliti til trygdarútgerð, tekniskar avbjóðingar og loysnir, skrokk-integritet og førleikar hjá manning sum heild. Átøk skulu gerast skjótast gjørligt og í komandi framtíð, trygdini á sjónum til frama," sigur Sjóvinnustýrið millum annað.

Øll frágreiðingin kann lesast her