Familjan hjá eini 38 ára gamlari kvinnu í Frankaríki hevur lagt sak, eftir at kvinnan fyrst bleiv koppsett við AstraZeneca og síðani doyði av blóðtøppi í heilanum.
Skipanin í Frankaríki er soleiðis, at til ber at leggja sak uttan at nakar beinleiðis er ákærdur ella kravdur eftir endurgjaldi. Familjan ynskir bara at fáa greiðu á, um koppingarevnið kann hava spælt ein leiklut í deyðanum hjá kvinnuni, hevur sakførarin hjá familjuni greitt frá.
Í Frankaríki eru tey byrjað aftur at brúka koppingarevnið hjá AstraZeneca, eftir at steðgað varð á í eina tíð, tí fleiri tyktust fáa blóðpropp eftir at hava fingið vaksinuna.
Enn er ikki staðfest um samband er ímillum blóðtøppar og vaksinuna, og eftirlitsmyndugleikarnir í ES hava sagt, at tað eru fleiri fyrimunir enn vansar við at brúka hana.
Um tú veitst okkurt, sum VP ikki veit - skriva so til vp@vp.fo