Aftaná guðstænastu í Hans Egede kirkju sunnudagin 4. oktobur, kl. 14:00, fer Sverri Steinhólm prestur at greiða frá Emil Joensen og Kristiliga ungmannafelagnum. Fríða Thomsen deknur, BA og stud. teol. prædikar.
Føroyska Kirkjuliðið í Keypmannahavn skipar í hesum døgum fyri ymiskum tiltøkum í samband við at eitt hundrað ár eru liðin síðani farið varð undir at halda regluligar guðstænastur á Føroyskum í ríkisshøvusstaðnum.
Tað var Gudmund Bruun próstur, ið saman við øðrum fór undir at halda guðstænastur í føroyskum, sum var eitt nýbrot tá, tí guðstænastumálið í Føroyum var annars danskt.
Fyrst í septembur varð hildin fyrilestur um Gudmudn Bruun og hannsara leiklut í hesum virkseminum, og nú sunnudagin 4. oktobur eiga Emil Joensen og Kristiliga ungamannafelagið tørn. Vágamaðurin Emil var prestur í Mariu Kirkjuni í Istegade frá 1924 og til 1961, og tað var hannsara hugskot, saman við m. ø. Janus Øssurson, at savna ungar føroyingar í Keypmannahavn til kristiligar samkomur. Hettar fundarvirksemi kom at hava stóra ávirkan á fleiri ættarlið av ungum føroyingum.
Sverri Steinhólm prestur hevur skrivað ritgerður um teir báðar Gudmund Bruun og Emil Joensen og um Kristiliga Ungmannafelagið í Keypmannahavn. Aftaná guðstænastuna sunnudagin 4. oktobur kl. 14:00, fer hann siga frá um Emil Joensen og virkinum hjá Kristiliga Ungmannafelagnum í Keypmannahavn.
Kirkjuliðið bjóðar sum vænt til kaffiborð. Øll eru vælkomin og tiltakið er ókeypis.
Um tú veitst okkurt, sum VP ikki veit - skriva so til vp@vp.fo