Rás 1: Búskapur & Vinna er nýggj aktualitetssending í fimm pørtum á Rás 1. Johnny í Grótinum er vertur, og saman við gestum og serfrøðingum setir hann sjóneykuna á ymisk búskaparevni. Fyrstu 3 partarnir av sendirøðini Búskapur & Vinna verða endursendir á Rás 1 hjá Televarpinum í kvøld frá klokkan 19:30. Sendingarnar vera endursendar tvær ferðir í dag, tá tær eisini kunnu síggjast frá klokkan 17:30. Øll kunnu síggja sendingarnar við at fara á https://web.tv.fo/ og stovna sær ókeypis brúkara ella hyggja eftir Rás 1 við vanligari sjónvarpsantennu.

Sending 1 snýr seg um Grøna orkuskiftið og árinini á privatu føroysku orkuvinnuna, har samrøður eru við Helmu Mariu Tróndheim, vinnu-phd hjá SEV, um íløgukrøvini, Birgir Nielsen um roknskapirnar hjá Effo og Magn, og Teitur Poulsen, nevndarformann í Magn, sum saman við øðrum íleggjarum herfyri keyptu Magn fyri hálva milliard krónur.

Sending 2 snýr seg um bankavinnuna og tey rák, ið raka føroysku bankarnar komandi árini. Samrøður eru við Sverri Justinussen, íløguleiðara, Olav Guttesen, bankastjóra í Betri Banka, og Árni Ellefsen, bankastjóra í BankNordik.

Sending 3 er um KT-vinnuna, har samrøður eru við Sverra Justinussen um niðurtúrin hjá Meta (Facebook), Leif Abrahamsen, stjóra á Gjaldstovuni, um nýggja vakstrarætlan fyri føroysku KT-vinnuna, og Heini Zachariassen, stovnara av Vivino, um útlitini fyri eini vaksandi føroyskari KT-vinnu.

Komandi mikukvøld fer Johnny í Grótinum, vertur í Búskapi & Vinnu, saman við serfrøðingum at viðgera møguligu búskaparligu avleiðingarnar fyri Føroyar av Ukraina kreppuni og herdum tiltøkum ímóti Russlandi, sum er ein týðandi útflutningsmarknaður fyri føroyskar fyritøkur.