Seinastu árini hjá Grant, sum fyrr æt H-Dygd, hava verið merkt av reyðum tølum. Felagið, sum hevur heimstað á Vatnsoyrum, hevði í fjør ein bruttovinning uppá 17,1 mió kr sum var 1,6 mió kr verri enn árið fyri, og ikki nóg mikið til at dekka útreiðslur til starvsfólk.
Úrslitið eftir starvsfólkakostnaðir var minus 700.000 kr, og so er onki til rentur, avskrivingar og annað. Samlaða hallið seinastu trý árini hevur verið um 9 milliónir krónur.
Grannskoðarin, sum felagið annars skifti út fyri tveimum árum síðani, ger vart við hesi viðurskiftini, og at felagið er bæði tyngt at vánaligum gjaldføri og negativum eginpeningi.
Fíggjarstøðan javnvigar við sløkum 30 mió kr, og skuldin er góðar 31 mió kr, harav helvtin er rentuberandi.
Leiðslan ætlar at endurreisa eginpeningin gjøgnum raksturin komandi árini.
Um tú veitst okkurt, sum VP ikki veit - skriva so til vp@vp.fo
