Frá Filmsfelagnum: Árliga filmstevnan í Cannes byrjar í dag. Onkrir miðlar kalla stevnuna heimsmeistarakappingina í filmi. Og okkurt er um tað, hóast hetta ikki er ein ítróttagrein, men nýggjasta listagreinin.

Tað er her, at mest áhugaverdu filmar verða frumsýndir og fáa umrøðu, hóast Oscarvirðislønin í einstøkum bólkum, so sum besti altjóða filmur, ikki skal undirmetast.

Í fjør var eingin filmstevna í Cannes, tí koronasmittan legði alt stilt.

Nú vísa vit aftur film í felag.

Í annaðkvøld vísa vit virðislønta ”Flugt”, sum skuldi verið vístur í Cannes í fjør. Hann varð í staðin sýndur einum altjóða áskoðaraskara á Sundance Film Festival í ár, og vann virðisløn fyri besta altjóða heimildarfilm.

Filmstevnan í Cannes heldur á til 17. juli, tá kunngjørt verður, hvør fær Gylta Pálman í ár.

Vanliga eru 40.000 vitjandi á filmstevnuni í Cannes, men eftir at eingin stevna var í fjør, vænta fyrireikararnir sambært tíðindastovuni AFP í mesta lagi helvtina.

Men ráð eru fyri tí.

Kom í Filmsfelagið í annaðkvøld og síggj ”Flugt” við egnum eygum, mitt í Havn.

Tað er filmur í felag. Her hjá okkum. Hvørt mikukvøld.

m: