Tað frættist frá stórum fongi seinastu dagarnar, bæði norðaliga og sunnaliga í landinum, nú farið er um líradag, og menn hava verið eftir havhestaungum seinastu dagarnar. Onkustaðni hevur ikki staðið á hjá tveimum monnum at fáa væl yvir 100 havhestaungar eftir bara eini løtu. Men sagt hevur eisini verið, at ungin er heldur lítil á vøkstri, í hvussu so er tað, sum higartil er komið á sjógv.
Lítið er at ivast í, at dagurin í dag fer at gera eitt trivaligt inntriv í stovnin, tí veðrið er av tí besta, streymurin góður og leygardagur er, so nógv hava frí.
Men tað er so sum so við burðardygdini í hesum eftir hondini gamla veiðusiði hjá føroyingum, tað heldur í øllum førum Havstovan.
Við Kringvarpið sigur Jóhannis Danielsen, sum hevur eina PhD. í lívfrøði, at av tí at vit hava ov lítla vitan um bæði veiðuna og stovnin, so fáa vit ikki sagt annað enn, at veiðan er ikki burðardygg.
Um tú veitst okkurt, sum VP ikki veit - skriva so til vp@vp.fo
