Longu í morgin steingja handlar, matstovur og skúlar í stórum pørtum av landinum, eftir at ein triðja flóðalda av koronasmittu floymir inn yvir landið.
Tað hendir eftir at talið á smittaðum er vaksi hvønn dag í tríggjar vikur.
Samstundis er staðfest, at talið á teimum sum eru deyð eftir at vera smittað við korona nú er farið upp um 100.000 fólk.
Um páskirnar verða tiltøkini herd enn meira. Tá verður bannað fólki at ferðast ímillum landspartar, og strangar avmarkingar verða eisini galdandi fyri, hvussu nógv fólk kunnu hittast.
- Eg veit, at hetta rakar tykkum øll sera hart. At tað rakar búskapin hjá okkum øllum og okkara mentalu heilsu. Men vit eru farin um nøkur ræðulig mørk, sum ongin hevði kunnað ímynda sær fyri einum ári síðani, sigur italski forsætisráðharrin, Mario Draghi.
Myndugleikarnir hava sett sær sum mál, at 80% av italska fólkinum skal vera koppsett áðrenn septembur.
Um tú veitst okkurt, sum VP ikki veit - skriva so til vp@vp.fo
