Ítróttavedding góðtekur ikki at lýst verður í Føroyum við pengaspølum, ið ikki hava avtalu við Spf. Ítróttavedding, sigur Jon Hestoy.

- Farna mikudag høvdu vit nevndarfund í Ítróttavedding har hetta málið millum annað bleiv viðgjørt.

- Niðurstøðan hjá okkara løgfrøðiligu ráðgeving er heilt greið, og er sum sum nevnt: Tað er ikki loyvt at lýsa í Føroyum við pengaspæli, uttan so at avtala er gjørd við Spf. Ítróttavedding, og Ítróttavedding fer at taka øll neyðug stig at støðga hesum lýsingum, sigur Jon Hestoy í svari til VP.

VP spurdi nevndarformannin í Ítróttavedding nakrar spurningar, sum Jon Hestoy so svaraði stutt og greitt í einum.

Spurningarnir vóru:

Spurningar til Ítróttavedding, nú tað sær út til at útlendsk veddingarfyritøka beinleiðis marknaðarførur seg á føroyska marknaðinum.

Skulu øll, ið bjóða út vedding og netspøl á føroyska marknaðinum, ikki hava avtalu við Ítróttavedding?

Hevur Coolbet, sum lýsur á leikbúnum og við leikvøll, slíka avtalu við Ítróttavedding?

Um ikki, hvat fer Ítróttavedding at gera við málið?

Fylgir Ítróttavedding við um møguliga aðrar fyritøkur eisini marknaðarføra seg á føroyska marknaðinum?

Er ikki vandin um fleiri slík feløg koma á marknaðin, at hetta kann føra við sær at útlutanin til føroyskan ungdóm frá Ítróttavedding lækkar munandi, verður Danske Spil ikki valt, sum hevur givið væl av peningini hvørt ár?