Tað er vindur í seglunum hjá fyritøkuni KJ Hydraulik við heimstaði í Fuglafirði.
Bruttovinningurin vaks við einum lítlum fimtingi - úr 67,7 mió kr í 2019 til 80,1 mió kr í fjør. Og tá gott tamarhald er á útreiðslusíðuni bar til at føra dastið av meirsøluni niður á botnlinjuna, soleiðis at úrslitið eftir skatt líktist eini tvífalding, ella úr 8,4 mió kr í 2019 til 15,1 mió kr í fjør.
KJ Hydraulik fæst við sølu, framleiðslu og handverk innan hydraulik og maskintøkni. Ikki minst veitingar til alivinnuna, serliga umvegis tvíkiljur, hava merkt fyritøkuna seinastu nógvu árini.
Deildir eru í Havn, Fuglafirði og Kambsdali, og dóttirfelag er eisini í Hirtshals.
Javnin hjá KJ Hydraulik er 147 mió kr og eginognin 74 mió kr.
Eigararnir eru kravlítlir - vinningsbýti var 4 mió kr í fjør, tað mesta nakrantíð og tvífalt so nógv sum árið fyri.
125 fólk høvdu sína dagligu gongd hjá KJ Hydraulik í fjør.
Ólavur A. Olsen er stjóri.
Um tú veitst okkurt, sum VP ikki veit - skriva so til vp@vp.fo