Síðani aldaskiftið er Klaksvík broytt eins og samfeldu Føroyar. Nógv er útbygt bæði á vinnuliga økinum, á mentanariøkum, á almanna- og heilsuøkinum og í kommunalum høpi.   – Hugburðurin hjá yngra ættarliðinm er eisini broyttur.

Neyðugt er tó at hyggja longur framá  - út um landoddarnar og framum. Lagt er upp til spennandi og mennandi framtíð  á øllum økjum.

Ein avmarkaður ”status” um støðuna ídag:
- Arbeiðsloysið hoyrir til tað lægsta í landinum.
- Íbúgvaratalið økist.
- Íbúðabyggingar hava ávísa ferð. Tað røkist fyri fleiri.  
- Vinnuligar útbyggingar bæði á sjógvi og á landi eru sjónligar.
- Í løtuni eru fyritøkur bæði í frumvinnuni og avleiddum vinnum hampuliga væl fyri og hava gott orð á sær.

Klaksvík hevur ikki fylgt við
Staðfestast kann , at seinastu 50 árini eru Føroyar fullkomiliga broyttar. Tað ”almenna” er vorðið bæði nógv størri, krevur meiri útbúgvið fólk og fólk í vitanarvinnuni. Samstundis er sentraliserað í stórum. Spurningurin er so, hevur Klaksvík fylgt við. – Haldi at svarast kann eitt greitt nei!  - Vit sum lands- ella býráðspolitikarar fyrr og nú hava ikki verið nóg vaknir!

Flestu almennu stovnar, skúlar saman við  avleiddum vinnum í Klaksvík, hava slettis ikki fingið nátúrligan vøkstur, men eru lutfalsliga minkaðar í stórum. Hetta ger, at Klaksvík er ov óstøðugt og sostatt viðbrekið.

Alemnnir stovnar, sum í síni tíð vóru stovnsettir í Klaksvík av norðoyingum, har hevur ”landið” tikið broddin av vøkstrinum. Onkur dømi av nógvum: t.d Klaksvíkar Sjúkrahús, stovnsett saman við eystursíðuni av Eysturoynni, Húsarhaldsskúlin, Klaksvíkar Sjómansskúli o.f.a. – Tó skal sigast, at Tekniski skúli og Sjónám hevur fingið nøkulunda frið.

Tørvandi útbyggingar av lansstovnum hevur gjørt Klaksvík til efturbát
Sentraliseringin til høvuðsstaðin hevur verið stórur ampi í menningini og størv í hópatali eru flutt hagar – vællønt størv – sum aftur gevur seg til kennar í vantandi peningi í kommunukassanum.

Sjón fyri søgn er, tá okkara ungu eru liðug við skúlan her og fara eftir víðari útbúgving, venda hesi bara aftur til vællønt størv, og tá tey eru horvin í Klaksvík, fara tey aðrastaðir serliga til høvuðsstaðin, eisini at seta búgv. - Her hava vit mist nógv!

Fari at vísa til skilagóðar greinar skrivaðar herfyri í Norðlýsið  av serfrøðingunum Ragnari Joensen, og Johnny í Grótinum. – Fari at heita á býráðið og politikarar, um at taka hesar uppaftur. – Kanska hevði tað verið eitt hugskot at endurprenta tær í Norðlýsinum.  

Vit hava mist tænastuveitingar bæði í privatum stovnum og almennum, tí tær eru sentraliseraðar, soleiðis, at ”tey ið liggja tættast miðdepilin fáa bestu tænastuna”. Sjálvt telesamskiftistænastur og samtyktir í avgerðum o.s.fr.

Nær fara útbyggingarnr í gongd
Lat meg til seinast nevna, at tær úbyggingar, sum fleiri ferðir eru givnar lyfti um bæði av politikarum og hava verið frammi í fjølmiðlum í 10 – 15 ár so sum Húsarhaldsskúlin, Sjúkrahúsútbyggingin o.a. hava verið ”árliga” útskotnar. -
Tað sum er alment útbygt er so gott sum alt fíggjað úr komunukassanum”

Alt í alt, hevur Klaksvík nøkulunda lívbjarga sær við privatum vinnum, men er vorðin stórur eftirbátur hvat almennum stovnum viðvíkir – har fleiri vóru skaptir í Norðoyggjum av norðoyingum, sum hava  ligið stórliga í órøkt bæði hvat viðvíkir viðlíkahaldi og víðari útbyggingum og fleiri eru fluttir.

Orsaka av sterkum vinnulívi, hevur tað gingið nøkulunda í Klaksvík, men almenna sentraliseringin við avleiðingum hevur køvt dygga framgond! - Tíðin er nú komin til at fáa hesi mál loyst! – Her skal nógv arbeiði leggjast í!

PS!
Til seinast tó! Vit kunnu øll fegnast um, at miðbýarætlanin gjørdist veruleiki, hevur rigga væl og kann útbyggjast!

Jógvan við Keldu