Komandi sunnudag, 1. sunnudag í atvent, verður konsert í Fuglafjarðar kirkju kl. 19:30, har Fuglafjarðar kvinnukór, Gentukórið gamla fer at syngja.

Konsertin ber heitið: Tankar og tónar - trúgvin og listin. Meðan sungið verður, verða myndir sýndar upp á ein dúk í kirkjuni og millum hvørt lagið, verður ein tekstur lisin upp í tilknýti til trúnna og listina.

Hetta er á triðja sinni, at henda konsertin verður, ið ber hetta heitið, Tankar og tónar. Tann fyrsta var  í 2011 og snúði seg um Stórubrúgv í Fuglafirði, sum varð umgjørd til fjósið í Bethlehem. Tann næsta 2013 og var um ljósið í  málningunum hjá Heðini Kambsdal og ljósið í Góðadali.

Tað er nógv, sum sigast kann um trúnna og listina. Læran er um lívið, vónina og tað innara lívið í samband við deyða og grøv, og verður eingilin  í hesum sambandi boðberin um nevndu evni. Ja, tað er nógv at tríva í. Nortið verður við myndlistina, tónlistina og skaldskapin.

Urguna treður Heðin Kambsdal, Jógvan á Lakjuni og Eyðun á lakjuni spæla upp á klaverið. Kristina Joensen lesur upp og Frits Johannesen stjórnar kórinum.