Komandi vikurnar fara koppsetingartoymir kring landið at bjóða fólki eitt prik. Byrjað verður í Norðoyggjum mánakvøldið.
Tað hevur yvirhøvur gingið væl at koppseta føroyingar, men seinastu tíðina er ferðin minkað nakað. Sjúkrahúsverkið hevur tí í samstarvi við kommunur gjørt nakrar royndir at gera tað lættari hjá fólki at lata seg koppseta. Vitjað hevur verið í Runavík, á Giljanes og á útoyggj.
Royndirnar av hesum hava verið góðar, og nú verða nýggj átøk gjørd fyri at gera koppsetingina meira atkomuliga hjá fólki, sum hava longri á koppsetingarstaðið.
Byrjað verður nú mánakvøldið og týsdagin í Norðoyggjum, síðani verður vitjað á Sandoynni og ætlanin er eisini at taka allar bygdirnar á Suðuroynni og í Norðstreymi seinni. Nærri kunning kemur um hetta.
Norðoyggjar mánadagin 6. september verður koppsett soleiðis:
Kl. 19.30 beint eftir Dag og viku verður koppsett í skúlanum í Kunoy
Kl. 20.30 verður koppsett í bygdarhúsinum í Haraldsundi
Kl. 21.15 koppsetur Sjúkrahúsverkið í Róðrarneystinum í Árnafirði
Sjúkrahúsverkið hevur sjúkrabil við, so fólk kunnu meta seg eftir, nær toymið er á staðnum. Tey sum hava hug, kunnu koma framvið og síggja útgerðina.
Norðoyggjar týsdagin 7. september verður koppsett soleiðis
Kl. 19.30 beint eftir Dag og viku verður koppsett í skúlanum á Viðareiði
Kl. 21.00 er koppsetingartoymið í skúlanum á Fossanesi og koppsetur
Um tú veitst okkurt, sum VP ikki veit - skriva so til vp@vp.fo