Tað sær út til at metstórur áhugi er fyri tilboðunum hjá kvøldskúlanum í høvuðsstaðarkommununi í ár.
Tá tilmeldingarskipanin lat upp í gjár høvdu 960 meldað seg til teir fyrstu 10 minuttirnar. Tað upplýsti skúlaleiðarin Jógvan Sørin Hansen fyri sendingini Góðan Morgun Føroyar hjá Kringvarpinum í morgun.
Einir 3.000 næmingar hava gingið á kvøldskúlanum seinastu árini.
Best umtókta skeiðið eitur Horn, Bein og Silvur, og har snýr tað seg um at læra at gera smykkur og skreytlutir. Annars eru tað tey handaligu skeiðini sum eru best umtókt.
Fleiri kvinnur enn menn ganga á skúlanum, tí umleið 70% av øllum næmingunum eru kvinnur. Hetta hevur skúlin roynt at bøtt uppá við at hava fleiri nýggj skeið, sum kanska eru meira til menn, eitt nú skeið í vápnatrygd og koyrikort til vatnskutara.
Trupulleikar við gjaldsskipanini gjørdu tó, at tilmeldingarnar í gjár verða strikaðar, og latið verður upp aftur av nýggjum fyri tilmeldingum um nakrar dagar.
Um tú veitst okkurt, sum VP ikki veit - skriva so til vp@vp.fo
