Tað er við at blíva for nógv av tí góða hjá myndugleikum og íbúgvum nógvastaðni í Spania, tí ungfólk úr øðrum londum í Europa drekka og ballast so nógv, at tað er onki stuttligt longur.
Myndugleikarnir í kendum og væl umtóktum støðum sum Magaluf og Playa de Palma á Mallorca fara nú at avmarka søluna av sonevndum all-inclusive túrum, tað vil siga, at luttakararnir kunnu eta og drekka so nógv teimum lystir.
Majorca Daily Bulletin skrivar, at all-inclusive fer at verða avmarkað, so tað merkir í mesta lagi seks gløs ella drammar um samdøgrið, ongin happy-hour skal vera longur, rúsdrekka skal ikki seljast í handlum, har sum nógvir turistar eru, og bøturnar fyri at bróta forboðini verða stórar.
Serliga Mallorca hevur verið illa plágað av drukturismu í nógv ár, men higartil hava myndugleikarnir aftrað seg við at seta avmarkingar. Fleiri deyðsføll í seinastuni hava tó gjørt, at nú koma avmarkingar, og hesar fáa, sum skilst, virkna alt fyri eitt.
Um tú veitst okkurt, sum VP ikki veit - skriva so til vp@vp.fo
