Tað búgva 1.411.778.724 (yvir 1,4 milliard) fólk í Kina.
Samtíðis vísur nýggja fólkateljingin at tað ikki hava verið so fáir barnsburðar í landinum í nýggjari tíð.
Kina hevur fólkateljing hvørt tíggjunda ár.
Í dag eru tølini fyri 2020 løgd fram av hagstovuni í landinum.
Nýggja teljingin vísur at fólkatalið er økt við 72 milliónum síðani seinastu fólkateljing í 2010.
Samtíðis vísur statistikkurin at vøksturin er nærum steðgaður upp. Árligi fólkavøksturin er nú 0,53 prosent, móti yvir 2 prosentum í 1980-unum.
Og útrokningar vísa at seinasta fólkateljingin helst er toppurin í fólkatalinum.
The Economist skrivar at sambært floksblaðnum Global Times fer fólkatalið helst at minka næsta ár.
Fram móti ár 2100 verður mett at fólkatalið í Kina fer at minka við um 750 milliónum, skrivar NRK.
Um tú veitst okkurt, sum VP ikki veit - skriva so til vp@vp.fo