Tað er nærliggjandi at hugsa, at tað er nógva virksemið í landinum, ikki minst innan byggivinnuna, sum sæst aftur í tølunum hjá fyritøkum sum partafelagnum Løvubetong á Norðskála.
Felagið velur ikki at upplýsa sølu og framleiðslukostna, men bruttovinningurin var 21 milliónir krónur, sum eru 3 mió kr meira enn árið fyri, sum tá var besta árið í yvirlitinum hjá Vinnuvitan.
Løvubetong megnaði at vaksa um bruttovinningin uttan at vaksa stórvegis um samlaðu útreiðslurnar - tær 8,8 mió kr sum fóru til starvsfólkakostnað var heldur meira enn árið fyri, hinvegin minkaðu avskrivingar og rentur. Tí lógu heilar 8,8 mió kr eftir til eigararnar tá landið hevði fingið nærum 2 mió kr í partafelagsskatti.
Fíggjarstøðan javnvigar við 75 mió kr, harav eginognin er 41 mió kr.
Løvubetong hevur goldið eigarunum út vinningsbýti á 3 mió kr seinastu nógvu árini.
Um tú veitst okkurt, sum VP ikki veit - skriva so til vp@vp.fo
