61 ára gamli Walid Abdulrahman Abu Zayed, sum er av palestinskum uppruna, bleiv norskur statsborgari í 1997. Frankaríki royndi í 2015 at fáa hann útflýggjaðan, men tá var hann vardur av norskari lóg. Tað er hann ikki longur, og nú stendur hann til at blíva útflýggjaður.
Tað var í 1982, at hann saman við øðrum framdi eina blóðuga yvirgangsatsókn ímóti eini jødiskari matstovu í París, tá seks vórðu dripin og 22 særd.
Walid Abdulrahman Abu Zayed skal hava verið ein av oddamonnunum í álopinum. Sjálvur noktar hann seg sekan og sigur, at hann als ikki var í París henda dagin.
Um tú veitst okkurt, sum VP ikki veit - skriva so til vp@vp.fo