Umleið 5,5 prosent av øllum føroyingum eru nú koppsettir ímóti koronu. Hesum boðar Heilsumálaráðið frá, eftir at koppsett varð á Sandoynni, í Havn og í Klaksvík í gjár.
Tilsamans 249 vórðu koppsett í gjár, og sostatt eru nú 2.912 føroyingar koppsettir fyri koronu.
Seta vit tað í lutfall til onnur lond ber til at staðfesta, at Føroyar eru frammanfyri Danmark, har samanumtikið fyri alt landið tilsamans 3,4% vórðu koppsett eftir koppsetingarnar sum vórðu gjørdar seinnapartin í dag. Í Íslandi vóru tilsamans 2,4% koppsett eftir dagin í gjár.
Tó eru onnur lond, ið eru komin nógv longri, eitt nú Ísrael, har nærum 40% av íbúgvunum eru koppsettir og Sameindu Arabisku Emiratini, har umleið 24% eru koppsett. Í USA eru 5,8% koppsett og í Stórabretlandi smá 9%.
Verða allir borgarar heimsins tiknir við sær ikki so gott út. Einans 0,77% av øllum heimsins borgarum vórðu koppsettir tá gjørt var upp seinnapartin í dag, sambært Our World in Data.
Um tú veitst okkurt, sum VP ikki veit - skriva so til vp@vp.fo
