Frans pávi er í dag komin aftur til griksku oynna Lesbos, sum eisini var miðdepil í kreppuni við migrantum tá hann vitjaði har í 2016.
- Latið okkum nú standa saman um at steðga hesi kollsiglingini av allari siðmenning, segði Pávin um viðferðina sum migrantarnir fáa í ES.
Pávin vitjaði millum annað fleiri flóttarfólkalegur, og á vitjan í Athen í gjár segði hann, at tjóðskaparlig spjaðing í ES er veruliga orsøkin til, at tað gongst so illa at taka sær av øllum flóttarfólkunum á europeiska kontinentinum.
84 ára gamli Frans pávi nýtti høvið til at fordøma umstøðurnar í flóttarfólkalegunum og segði, at tað mest av øllum líktist trælahaldi og torturi.
Yvir 1500 flóttarfólk eru higartil í ár druknað ella eru horvin í royndini at sleppa til Europa.
Um tú veitst okkurt, sum VP ikki veit - skriva so til vp@vp.fo