Okkurt bendir á, at tað eisini prutlar undir lokinum hjá teimum sum manna eitt nú barnagarðar, vøggustovur og aðrar stovnar í Føroyum. Føroya Pedagogfelag hevur gjørt vart við, at heldur ikki har eru tey nøgd við ta lønina og kanska serliga ta plaseringina á lønartalvunum, sum tey hava í mun til onnur.

Nevndin fundast í løtuni innanhýsis og við álitisfólk fyri at kunna um støðuna, og fyri at vita, hvat baklondini halda um støðuna.

Samráðingarnar við lønardeildina hjá Fíggjarmálaráðnum hava tikið støði í tí sáttmálanum sum Starvsmannafelagið longu hevur gjørt, og tað vilja Pedagogarnir ikki finna seg í. Júst sama støða gjørdi seg galdandi hjá sjúkrarøktarfrøðingunum, sum nú eru í verkfalli.

Jógvan Philbrow, formaður í Pedagogfelagnum, segði við Kringvarpið í morgun, at tey ivast í um tað nyttar nakað at fara á ein fund við Fíggjarmálaráðið, sum ætlandi skal vera mánadagin.

Eins og hjá sjúkrarøktarfrøðingunum er útbúgvingin hjá pedagogum nú á bachelorstigi, men tað sæst ikki aftur í lønini, meina tey.