Politiið í Føroyum hevur í seinastuni javnan verið at sæð alvápnað í býarmyndini í Havn. Ein venjing sum skuldi vera í dag bleiv avlýst, men roknast kann við fleiri venjingum komandi tíðina.
- Hesar venjingarnar hava í veruleikanum verið í fleiri ár, men tað er ikki altíð, at tær eru í fólkaeygum, viðhvørt eru tær innandura, tað upplýsir vakthavandi á politigarðinum í Havn fyri VP.
Talan er um eftirmeting av yvirgangsatsóknini á Utøya og í Oslo í 2011, tá tilsamans 77 fólk lótu lív. Politiið í øllum norðurlondum hevur verið við í teirri eftirmetingini, til tess at vera betri fyrireikað.
- Talan er um sonevndar Romeo patruljur, sum skulu vera tilbúnar alla tíðina, sigur vakthavandi.
Spurdur um tað er neyðugt við slíkum í Føroyum sigur hann, at tað er tað heilt víst.
- Tað eru javnan støður, har vit ikki vita, hvørjum vit eru uppi ímóti, og tí noyðast at vera til reiðar, sigur hann.
Um tú veitst okkurt, sum VP ikki veit - skriva so til vp@vp.fo
