Russiski forsetin, Vladimir Putin, er nú til reiðar at tosa um at loyva korni frítt at fara úr Ukraina. Tað hendir eftir at hann í dag hevur tosað í telefon við bæði franska forsetan, Emmanuel Macron, og týska samveldiskanslaran, Olaf Scholz.
Men sambært Reuters setti Putin krav um, at so skulu fleiri av tiltøkunum, sum vesturheimurin hevur sett í verk ímóti Russlandi eftir innrásina í Ukraina, eisini takast av.
Fleiri vestanveldi skuldseta Russland fyri at brúka eina møguliga hungursneyð sum vápn í krígnum. Russland sigur hinvegin, at um ein hungursneyð hóttir, so er tað av tiltøkunum sum vesturheimurin hevur sett í verk ímóti Russlandi, eins og minum sum eru lagdar út í ukrainskar havnir.
Vladimir Putin skal eisini hava sagt, at russar fegnir vilja í dialog við ukrainar, men hesir vilja ikki.
Um tú veitst okkurt, sum VP ikki veit - skriva so til vp@vp.fo