Royal Greenland, sum longu eigur seks fiska- og rækjuvirkir í Nýfundlandi, hevur keypt fýra virkir afturat. Sostatt er grønlendska heimastýrið, sum eigur Royal Greenland, vorðið størsti einstaki aktørur innan virking av fiski og rækjum har á leiðini, tað skrivar almenni kanadiski miðilin CBC. Tað eru virkir hjá Quinlan Brothers í Old Perlican, Bay de Verde og Baie Verte sum nú skifta eigarar.
Handilin er góðkendur av myndugleikunum, men ikki øll eru fegin um hann. Fakfelagið hjá teimum sum arbeiða í fiski heldur, at virkini savnast á alt færri hondum, og tingini henda uttan at nøkur verulig viðgerð hevur verið av hvørjar avleiðingar broytingarnar kunnu hava.
Royal Greenland keypti fyrstu virkini í Nýfundlandi í 2016, og CBC endurgevur lokalar keldur fyri at siga, at Royal Greenland hevur gjørt stórar íløgur og skapt nógv arbeiðspláss hesi árini.
Um tú veitst okkurt, sum VP ikki veit - skriva so til vp@vp.fo
