Korona sást ikki aftur í søluni hjá Rúsdrekkasølu Landsins í fjør. Sølan var næstan 146 milliónir krónur - meira enn fýra milliónir meira enn árið fyri og næstan 10 mió kr meira enn í 2018.
Orsøkin er fyrst og fremst stóra fólkatilflytingin umframt, at tað gongur væl búskaparliga í Føroyum.
Tað sæst í seinastu ársfrágreiðing hjá Rúsuni.
Men hóast sølan setur met, so er nýtslan av alkoholi fyri hvønn íbúgva yvir 15 ár ikki vaksandi.
- Nýtslan í Føroyum liggur á umleið 6,3 til 6,6 alkohol litrar árini frá 2011 til 2020, sigur Rúsan millum annað í ársfrágreiðingini. Lagt verður tó afturat, at veruliga nýtslan helst er nakað hægri, tí tað sum verður innflutt tollfrítt er ikki við í tølunum.
Eisini er eitt rák, at meira verður selt av tí veikara og minni av tí sterkara.
- Í 2011 vórðu seldir 76.516 litrar innanlands av reinum alkoholi í spiritusi, men í 2020 var talið minkað heilt niður í 70.076 litrar.
Um tú veitst okkurt, sum VP ikki veit - skriva so til vp@vp.fo
