Listafólk og onnur í Tórshavnar kommunu, sum fáast við mentanarligt arbeiði, kunnu gista í eina til tvær vikur í Villa Bergshyddan í Stokkhólmi. Umsóknarfreistin er sunnudagin.
Tórshavnar kommuna tekur lut í norðurlendskum høvuðsstaðarsamstarvi á mentanarøkinum saman við Helsinki, Oslo, Stokkhólmi, Keypmannahavn, Reykjavík, Nuuk og Mariehamn.
Stokkhólms kommuna býður íbúgvum í norðurlendsku høvuðsstøðunum at búgva í Villa Bergshyddan í styttri tíðarskeið í summarhálvuni og arbeiða við virksemi sínum.
Hesi kunnu t.d. vera høvundar, tónleikarar, sjónleikarar, myndlistafólk, tíðindafólk, granskarar og onnur, sum í breiðari merking fáast við mentan.
Kostnaðurin er 1600,- svenskar krónur um vikuna. Dentur verður lagdur á, at tey, sum fáa innivist í Villa Bergshyddan, knýta sambond við starvsfelagar í Stokkhólmi og á tann hátt veita sínámillum kunning og møguliga eisini fáa í lag samstarv.
Freistin at søkja er sunnudagin 12. februar 2017 og umsóknirnar skulu sendast til kultur(at)stockholm.se
Fleiri upplýsingar um stuðulin og umsóknarbløð eru á:
stockholm.se/kulturfritid/stod/nordiskt_kultursamarbete
Um tú veitst okkurt, sum VP ikki veit - skriva so til vp@vp.fo