Reyði Krossur Føroya: Regntíðin er byrjað í Bangladesj, og í ár hevur hon elvt til metstóra vatnflóð. Serliga landnyrðingsparturin av Bangladesj er hart raktur.
Síðan fyrst í juni hevur áarføri lagt so gott sum heilar landspartar undir í vatni. Fleiri øki liggja púra avskorin, tí vegirnir eru undir í vatni, og eingin streymur er.
Mett verður, at fleiri enn 7,2 mió. menniskju er ávirkað og hava átrokandi tørv á skjóli og neyðhjálp.
Reyði Krossur Føroya letur 300.000 kr. til hjálpararbeiði í hesum sambandi.
Í løtuni arbeiðir Reyði Krossur í økinum serliga við at veita bráðfeingis hjálp: at syrgja fyri skjóli, geva mat og reint drekkivatn, heilsutænastur og sálarligan stuðul.
Í komandi tíðini fer arbeiðið eisini at snúgva seg um endurbyggjan, so sum hjálp til at umvæla hús og heim, hjálp at keypa neyðugt innbúgv og reinførisútgerð, hjálp at fáa gongd á at vinna sær til lívsgrundarlag aftur, eitt nú við at keypa fræ til bøndur, sum kunnu fáa gongd á landbúnaðan aftur.
Um tú veitst okkurt, sum VP ikki veit - skriva so til vp@vp.fo