- Smittutrýstið er ov høgt í løtuni, ynskið er at halda eini so vanlig jól sum gjørligt, men nú omikron smittan er staðfest í sjúkrahúsverkinum kunnu vit ikki sita hendur í favn.

Soleiðis segði Bárður á Steig Nielsen, løgmaður, á tíðindafundi um støðuna sum er beint nú.

- Vit eru enn í gula økinum, men hesar broytingar verða gjørdar næstu dagarnar:

• Nú kunnu í mesta lagi 100 fólk savnast við koronapassi og 20 uttan koronapass.

• Allir skúlar verða stongdir og næmingarnir sendir heim frá mikudegnum 15. december. Frítíðarskúlar verða eisini stongdir, men dagstovnar eru undantiknir.

• Náttarlív og matstovur skulu lata aftur kl 23 á kvøldi - hjálparpakki er á veg í tingið í hesum sambandi.

• Jólaborðhald skulu bert haldast saman við teimum, sum ein vanliga er saman við, og í mesta lagi 20 fólk skulu vera við.

• Handlar skulu tryggja spritt, reinføri og at neyðug frástøða kann haldast.

• Kanningar við markið verða aftur settar í verk í næstum - tað er ikki greitt júst nær tað byrjar.

Løgmaður heitti eisini á allar gestir úr útlandinum, sum koma til landið um jólini, um at fara í heimauppihald í 2 dagar og lata seg kanna á øðrum degi eftir komu.

Tummas í Garði, læknastjóri, nevndi, at 28 starvsfólk á Landssjúkrahúsinum eru smittað, harumframt eru nógv starvsfólk í sóttarhaldi, men summi fáa ikki verið í sóttarhaldi, tí tey kunnu ikki verast fyri uttan. Flestallar skurðviðgerðir, sum kunnu, eru útsettar.

Tú kanst fylgja við tíðindafundinum her

Les síðuna hjá løgmansskrivstovuni her