Hagstovan: Keypihugurin hjá føroyingum er ikki neiliga ávirkaður av koronu – heldur hinvegin benda tølini á, at handlar innan smásølu hava havt úr at gera.
Umsetningurin í virði og umroknað til mongdir fyri smásølu av trimum vørubólkum er gjørdur upp fyri 4. ársfjórðing í 2020. Tølini eru býtt í vørubólkarnar 'matur og alkoholfríar drykkjuvørur', 'klædnavørur og fótbúnaður' og 'húsbúnaður og húsarhaldsútgerð'.
Nýggjastu hagtølini fyri smásølu vísa, at føroysku húsarhaldini hava økt munandi um keypið av vanligu gerandisvørunum í 2., 3. og 4. ársfjórðingi í fjør samanborið við somu ársfjórðingarnar í 2019. Greið tekin eru harvið um, at nýtslumøguleikin og keypihugurin ikki hava latið seg ávirka neiliga í tíðini við koronu.
Fyri 'matvørur og alkoholfríar drykkjuvørur' var umsetningurin 11% hægri í 4. ársfjórðingi 2020 í mun til sama tíðarskeið í 2019. Fyri alt 2020 hevur vøksturin í umsetningi fyri hendan vørubólkin verið óvanliga stórur – í miðal hevur vøksturin verið knøpp 14% fyri alt 2020 samanborið við 2019. Prísir á 'mati og alkoholfríum drykkjuvørum' eru í miðal øktir 0,7% frá 4. ársfjórðingi í 2019 til sama tíðarskeið í fjør.
Um tú veitst okkurt, sum VP ikki veit - skriva so til vp@vp.fo