Hagstovan: Stórar broytingar eru hendar í ferðsluni síðani aldarskiftið, har talið av akførum er økt til meir enn tað dupulta, og ferðsluóhappini samstundis eru fækkað niður um ein triðing.

19-túsund akfør vóru ár 2000 - nú er tey stívliga 40-túsund
Frá 1. jan. 2000 til 1. jan. 2021 er talið av skrásettum motorakførum vaksið úr sløkum 19-túsund upp um 40-túsund. Tað eru stívliga 21-túsund fleiri. Av hesum er talið av persónbilum vaksið við sløkum 13-túsund. Sjálvt um fólkatalið eisini er vaksið munandi, so er vøksturin í talið av akførum tó enn størri, tí í 2000 vóru tað yvir trý fólk uppá hvønn persónbil, meðan tað nú í 2021 vóru tvey fólk uppá bilin. Roknað vit bara fólk frá 18 árum og eldri, vóru tað 2,3 uppá bilin í 2000, samanboðið við 1,5 í 2021.

Ferðuóhappini fækkað niður í ein triðing
Fyrst í hesari øldini var talið av ferðsluóhappum eini 1200 -1300 árliga, men tey eru síðani fækkað støðugt niður í 410 í 2020. Hetta vísa yvirlit hjá løgregluni.

Fólkaskaðar í ferðsluni eru eisini fækkaðir nógv og somuleiðis talið av ákærdum fyri rúsdrekkakoyring.

Talið av fólkaskaðum í ferðsluni lá millum 60 og 70 árliga mitt í 00-unum fram til 2008, men so kom eitt stórt fall niður móti eini 30 í 2010 og hevur síðani tá verið millum 25 og 30.

Ongin lat lív í ferðsluvanlukku í 2020, í 2019 var tað ein persónur. Í 2018 var tað heldur ongin, og var tað tá fleiri enn 50 ár síðani, at hetta hendi. Seinastu 5 árini (2016-2020) eru 6 fólk deyð í ferðsluni í Føroyum. Tey 5 árini frammanundan (2011-15) vóru tað 15 fólk, sum lótu lív í ferðsluni.

Les meira