Fyrrapartin í dag setti eitt Boeing 737-800-flogfar hjá niðurlendska flogfelagnum Transavia seg á flogvøllin í Sørvági. Flogfarið er 39 metrar langt og 35 metrar breitt.
Flogfarið, ið tekur 189 ferðafólk fór úr Køln í Týsklandi í morgun. Við í flogfarinum vóru 80 ferðafólk, sum skulu ferðast í Føroyum til leygardagin, tá ið tey flúgva aftur til Týsklands.
Transavia er eitt stórt evropeiskt lágprísfelag, og hevur høvuðssæti í Niðurlondum. Transavia er eitt dótturfelag hjá risastóra flogfelagnum, Air France-KLM.
"Talið av charterflogførum til og úr Føroyum hevur verið vaksandi seinastu árini. Vit á flogvøllinum eru glað fyri at ymisk sløg av flogførum koma hendanvegin soleiðis, at vøllurin stendur sína roynd", sigur Jákup Sverri Kass, stjóri á Vága Floghavn
Um tú veitst okkurt, sum VP ikki veit - skriva so til vp@vp.fo
