Strandfaraskipið Ternan er farin á land í Skopun, Inni á Pollinum, tey kalla.

VP frættir, at ferðafólk eru umborð á Ternuni, men tey verða nú fingin í land við hjálp frá øðrum skipum ella bátum.

Strandfaraskip Landsins siga lítið um tilburðin á heimasíðuni. Sagt verður bara, at Ternan hevur "borið við land", og arbeitt verður við at fáa staðfest, nær hon kann fara aftur í sigling.

Líkt er til at okkurt er gingið galið við stýrigreiðunum, tí Ternan sær út til at hava hildið fram við somu ferð inn í fjøruna í stóra hylinum, har vanliga verður snarað runt og síðani bakkað inn í tann innara hylin, har lagt verður at.

Ternan hevur júst verið til klassingar á Klaksvíkar Sleipistøð. Tað arbeiðið gjørdist munandi meira umfatandi enn av fyrstan tíð hildið. Ymiskt bleiv skift ella broytt sum hevði við manøvreringina at gera, og manningin skuldi seta seg inn í og venja seg við broytingarnar bleiv sagt.

Jóan Petur Abrahamsen, tekniskur leiðari hjá SSL, sigur, at tey ikki hava fingið greiðu á, hvat er gingið galið, men líkt er ikki til at skipið er farið at leka.